Atu ba fatin foun ida presiza halo preparasaun: Atu ba ne'ebé, oin-sá atu ba fatin ne'e; sá transporte mak sei uza; atu to'o ba fatin destinadu la la'o sala no lakon iha dalan, sé mak ita fiar atu husu tulun no sá mak ita sei uza atu gia ita?
Pergunta hotu iha leten indika katak ema nia nesesidadi fundamental ida mós mak orientasaun. Antes desidi halo asaun ida presiza buka da'uluk orientasaun. Presiza hatene posizaun prezente no atu movimenta hosi parte ne'ebé atu to'o ba destinu referidu.
Filozofia kona-ba ema defini katak ema nu'udar kriatura ne'ebé hatene (saber) no hakarak (querer). Signifika ema nia hakarak (vontade) presupoin koiñesimentu. Nia asaun hotu bazeia ba nia kumpriensaun tomak, atu planu hotu bele realiza ho di'ak no susesu tenki hola konta fatóres hotu ne'ebé sei hasoru iha oin ka iha futuru. Tanba ne'e ema presiza orientasaun atu orienta nia hakarak no asaun ka obra ne'ebé atu halo labele sai ka lori fali ameasa ba nia iha futuru.
Kuandu asuntu ne'e klarifikadu, bele hatene ona atu respota pergunta fundamental ne'e: Oin-sá hau tenki moris no sá mak atu halo? Ida ne'e duni mak étika nia papél atu tulun ita hodi buka orientasaun lolo'os. Wain-hira la iha orientasaun mak ita moris tuir de'it ema seluk nia hanoin no ko'alia. Tanba ema seluk nia ko'alia no hanoin bele sala no la lo'os. Izemplu, ema ida ko'alia kona-ba kareta maibé nia nunka envolve iha halo kareta ou pelumenus le'e ona Livru Manual no konduz kareta. Iha situasaun rungu-ranga hanesan ne'e, étika hakarak tulun no kapasita ita atu toma rasik responsabilidadi ho ita nia moris.
Comments
Post a Comment