SÓKRATES PIONEIRU FILOZOFIA MORAL

Matenek Halo Pergunta Nain

            Sókrates pioneiru filozofia moral nian. Nia harí metudu buka lialós ho halo pergunta beibeik. Nia mak filózofu Gregu primeiru nebé moris nudar sidadaun Atenas. Nia moris iha era susesu boot iha sidadi ne’e. Maizumenus 470 AC nia moris no mate maizumenus 399 AC ho husik hela fen ida no oan nain tolu. Wainhira sei klosan nia estuda filozofia sanak oioin nebé sai daudaun nudar mode foun ida iha tempu nebá, hanesan “filózofu sira antes Sókrates”, konaba maneira oioin atu hatene mundu nia natureza nebé iha besik ita. Iha buat rua nebé halo nia impresiona ba hanoin ka pensamentu filózofu sira ne’e, nebé tuir nia haré nudar sira nia falta.

            Primeiru, mak sira nia hanoin nebé barak la hanesan, iha teória barak kontradiz. Sira ható ideia barak nebé furak konaba mundu, maibé sira la fó atensaun nebé sufisiente ba métodu krítiku. Nia rezultadu, iha sira let susar atu defini ida nebé lós. Maibé, Sókrates nia segundu krítika, karik mos ita bele defini ida nebé mak lós husi ideia sira ne’e hotu, laiha utilidadi barak. Iha influénsia saida ba ita nia moris karik ita bele hatene loron-matan nia dok husi rai ou loron-matan nia medida hanesan ho peloponezu ou bele karik nia boot liu fali rai? Karik ita nia hahalok sei laiha influénsia liu tanba iha koiñesimentu hanesan ne’e. Buat nebé ita presiza hatene mak oin-sa halao moris no organiza ita nia-an rasik. Kestaun nebé urjente: Diak ne’e saida? Lós ne’e katak saida? Justu ne’e saida? Se ita hatene resposta ba pergunta sira ne’e, lalika dúvida, sei iha nia influénsia boot tebetebes ba ita nia maneira moris.

            Sókrates rasik senti la hatene resposta sira ne’e. Maibé, nia haré katak ema seluk mos lae. Wainhira orákulu iha templu Delfos dehan Sókrates nudar ema ida nebé matenek liu, ba Sókrates ida ne’e signifika nia rasik deit nebé hatene katak nia la hatene buat ida . Lós, iha tempu nebá, seidauk iha koiñesimentu nebé metin no makás relasiona ho mundu naturál no detaillu mundu ema nian.

            Tanba ne’e nia mos sai ba sidadi Atenas tomak hodi ható daudaun pergunta fundamentál sira konaba moralidadi no polítika. Nia husu ba ema ida, porizemplu, fuan-boot no hanoin boot, maibé lolós sira seidauk hatene nia.

            Maneira Sókrates ható pergunta sai famozu. Tanba nia pergunta nia efeitu hanesan ho fatuk ida nia tuda bele hamonu manu rua. Iha parte ida, maneira ne’e hatudu ignoránsia ema sira nebé senti-an hatene, maibé defatu sira la hatene barak hanesan buat nebé Sókrates hatene. Iha parte seluk, maneira ida ne’e mos hamoris fali interese observador sira ba perguntas filozófiku nebé fundamenál, nebé hafoin dada sira atu tuir debate konaba kestaun ne’e. Maski Sókrates rasik raru tó ba resposta sira nebé finál (ida ne’e konsekuénsia husi nia métodu nebé nia obriga katak resposta hotu tenki prova beibeik no tenki kestiona, no tanba ne’e labele konfia nudar resposta nebé “finál” ona), nia susesu estimula ema sira nia interese no sira nia paixaun ba problema oioin nebé foti ba leten, no halo ema konsiente liu tan no valoriza susar oioin nebé iha ema nia esforsu atu rezolve problema sira.