SÓKRATES: METUDU DIALEKTIKU

            Karik la iha filózofu seluk nebe influénsiadu liu Sókrates. Nia da'uluk liu hanorin kona ba ema ida nia integridadi importanti tebes nudar ema nia obrigasaun prínsipál ba nia-an rasik. Ema ida nia obrigasaun laos ba Maromak ka ba lei ka ba fali autoridadi nebe deit. Hanorin ida ne’e ha ninia influénsia inkontável, labele sura durante sékulu tomak, to ohin loron. Laos deit nia hakarak mate iha lei nia liman duke nia tenki pára hatete kona ba sa mak nia fiar nudar lia los. Ema ida nia integridadi importanti atu hato fila-fila durante istória tomak husi figura boot mundiál sira nia ibun, ema sira nebe la merese hetan Sókrates nia influénsia.  Jezus hateten, “Iha folin sa atu ema hetan mundu tomak, maibe nia harahun nia-an rasik?” No William Shakespeare hatete, “Da' uluk liu, tenki onestu ba an rasik.”

            Alein né, Sókrates iha méritu boot harí prinsípiu né: Buat hotu tenki nakloke ba atu husu, hato pergunta nodi klarifika buat nebe sei iha dúvidaz laran. La iha resposta ida mak final lolós. Tanba kada resposta, hanesan deit ho buat sira seluk, sempre nakloke atu husu, ka hato pergunta buka klaridadi. Prinsípiu ida né harí metudu ida nebe koñesidu ho naran dialektika, katak metudu hodi buka lia los liu husi prosesu husu no resposta. Desde né, dialektika uza iha fatin barak nudar metudu hanorin nian. Maibe metudu ida né la sempre serve atu uza ba hanorin hothotu. Nudar izemplu, metudu dialektiku la serve uza atu hato informasaun. Maibe, hodi dada ema atu haré ka análiza fali buat nebe karik sira seidauk hatene, la iha metudu seluk bele kompara ho metudu né. Atu efetivu, metudu ne’e presiza relasaun personal ida nebe simpátiku entre mestri ho alunu ka estudante. Mestri hatene lolos difikuldadi nebe nia estudante sira hasoru. Mestri nia obrigasaun dudu sira husi hakat ida ba hakat seluk to sira bele deskobre lia los. Maneira ida né, to agora dala barak sei hanaran nudar “Métudu Sókrates”.